Product Summery

“Anna Frank kundaligi” - jahon adabiyotidagi eng mashhur kundalik-asarlardan biri boʻlib, unda yosh yahudiy qiz - Annaning Ikkinchi Jahon urushi davrida oʻtgan ikki yillik yashirinishdagi hayoti tasvirlangan. Anna va uning oilasini konsentratsion lagerga olib ketishganida, ushbu vayronkor davrlarni hikoya qiluvchi kundalik maxfiy boshpanada qoladi. Uni esa oilaning eng yaqin doʻsti Mip Giz asrab qoʻyadi va keyinchalik Holokostdan tirik qolgan yagona oila aʼzosi, Annaning otasi Otto Frankka topshiradi. Otto uni tahrir qiladi va kundalik 1947-yilda ilk bor golland tilida kitobxonlar qoʻliga yetib boradi va keyinchalik eng koʻp tarjima qilingan bestseller asarga aylanadi. “Anna Frank kundaligi” shu paytgacha yetmishdan ortiq tillarga tarjima qilingan va oʻttiz milliondan ortiq nusxada chop etilgan. Shuningdek, ushbu kitob jahon adabiyotida “Injil”dan keyin eng koʻp mutolaa qilingan nobadiiy asar hisoblanadi. “Anna Frank kundaligi” juda koʻplab nashrlar tomonidan XX asrning eng yaxshi kitoblari oʻnligida eʼtirof etilgan. Ushbu kundalik asosida bir necha sahna asarlari va filmlar suratga olingan. Anna yashiringan uy esa 1960-yilda uning nomidagi muzeyga aylantirilgan. Kitob maktub holida yozilgan boʻlib, unda oʻsmir qiz Annaning ichki kechinmalari, dunyoga qanday nazar bilan boqishi aks etadi. Kitobni oʻqir ekansiz, qanday qilib shoʻx-shodon, oʻzini gapirishdan tiyolmaydigan qizaloqning ikki yil davomida tashqi dunyodan yiroqda, oʻz tuygʻulari ogʻushida hayot kechirganini bilib olasiz. Kundalikka Kitti deya nom bergan Anna, uni eng yaqin doʻsti sifatida qabul qiladi va bor oʻy-hayollarini u bilan boʻlishadi. Bu kitob sizga Ikkinchi jahon urushi davrida qirgʻinga uchragan yahudiylar hayotini, ularga qanchalik ogʻir boʻlganini, yosh Anna, buyuk yozuvchi boʻlishni orzu qilgan qiz nigohi bilan koʻrish imkonini beradi. Dastavval Anna kundaligini faqat oʻzi uchun yozgan,1944-yilning bahorida esa kutilmaganda radioda Niderlandiya taʼlim vaziri Bolkenshteynning bir eʼlonini eshitib qolgan. Vazir niderlandlarning okkupatsiya paytidagi barcha daliliy hujjatlari milliy mulkga aylanishi lozimligini taʼkidlagan. Uning soʻzlaridan taʼsirlangan Anna urush nihoyasiga yetganidan keyin oʻz kundaligi asosida kitob nashr etishga qaror qilgan hamda baʼzi joylarini qayta yoza boshlagan, nimalarnidir oʻzgartirgan, oʻziga qiziq tuyilmagan qismlarini olib tashlab, yangilarini qoʻshgan. Kundalikning ikkinchi, qayta ishlangan nusxasida Anna barcha qahramonlarga, shu jumladan, oʻziga ham maxsus taxalluslar oʻylab topgan. Dastlabki nashrda Otto Frank oila aʼzolarining haqiqiy ismlarini qoldirib, qolgan taxalluslarni qisman saqlab qolgan. Keyingi nashrlarda haqiqiy ismlar oshkor qilingan, taxalluslardan faqat Albert Dyussel, Augusta, Hermann va Piter Van Daanlar saqlab qolingan. Ularning haqiqiy ismlari quyida keltirilgan. Van Pelslar oilasi: Augusta, Herman va Piter Van Pelslar bu kitobda Petronella, Herman va Piter Van Daan sifatida tasvirlangan. Fritz Pfeffer esa Albert Dyussel taxallusi ostida taqdim etilgan.