Product Summery

"Pollianna" asari ilk bor kitob holida 1912-yilda nashr qilingan. Odam yaxshi asar oʻqiganida goʻyo anchadan beri koʻrmagan doʻstini koʻrgandek xursand boʻlib ketadi, dunyoning bor tashvishini unutib kitob ichiga goʻyo kirib ketadi. Elinor Porterning "Polianna" kitobini oʻqish jarayonida men ham ana shunday holatga tushdim. Atrof bir zumda jimjit boʻlib qoldiyu, Polianna ismli qiz bilan birga sayr qildim. Oʻsmir qizchaning har bir gapi menga goʻyo koʻzgu tutgandek boʻldi. U toʻshakka mixlangan bemor oldiga borarkan, siz oyoq qoʻlingiz qimirlayotganiga xursand boʻlishingiz kerak dedi. Yoʻlida uchragan odamdan kamchilik emas fazilat axtarayotgan qizchadek bir kun yashab koʻrsam, xuddi bir sandiq boylik topgandek xursand boʻlib ketdim. Rosti, Poliannaning har bir narsadan yaxshilik topish oʻyini hayotimizni yengillashtiribgina qolmay, undan zavqlanishni ham oʻrgatadi. Taqdir taqozosi bilan yetimlik zahrini tortayotgan qizcha bagʻritosh xolasi qalbini yumshatishga ham erishdi, unga insondek yashash ilmini oʻrgatdi. Asar butunlay boshqa yurtda yozilgan, voqealar bizdan olisda boʻlgani bilan muammolar bizga yaqin. Juda juda yaqin. Masalan, Poliannaga xolasi darslardan iborat kun tartibi belgilarkan, u xolajon, buuncha dars qilsam qachon yashayman axir deb soʻraydi. Darhaqiqat, nafaqat oʻzimiz balki goho farzandlarimizga ham shunaqangi koʻp yuklama yuklaymizki, u zavqlanish, toʻyib shoʻxlik qilishni ham unutib qoʻyayotgandek. Poliannaning shahdi, shijoati va gaplari bizni oʻzi yoshku, taqdir zarbasidan ulgʻaygan qizning dardlariga sherik qiladi. Har bir kunimiz, daqiqamizdan shukronalik bilan unumli foydalanib qolishga undaydi. Hamma narsadan yaxshilik qidiraversangiz, koʻngilsizliklar oʻz oʻzidan esdan chiqadi. Qahramonning ushbu gapi, koʻngillarga malham beribgina qolmay, goʻyo dimiqqan xonaga kirgan togʻ havosidek odamni xursand qiladi.