Product Summery

Gi de Mopassan fransuz novellachiligini yuqori pog'onalarga ko'tarilishiga zamin yaratgan yozuvchilardan biridir. Mamlakatning ko'zga ko'ringan tanqidchilari uning ijodi borasida yakdil fikrda edilar. Emil Zolyaning e'tiroficha, u hissiyotlarni noziklik ila jo'sh urdirdi, muloyim mutoyiba va quvlik bilmas surur vositasida omma e'tibori va hurmatini qozondi. Jorj Lemetr Mopassanni klassik yozuvchi deb atadi. Mopassan qisqa umri davomida sof muhabbatni kuyladi, ma'naviy yuksak oddiy kishilarni qadrlab, vatanparvar va jasoratli insonlarni tarannum etdi. Mopassan ma'naviy qashshoq, munofiq kishilar obrazining butun bir silsilasini yaratgan kam sonli ijodkorlardan biridir. E'tiboringizga havola etilayotgan ushbu to'plamdan turmush qa'riga uloqtirilgan notavonlar hayoti, oddiy kishilar qismati yuksak mahorat bilan tasvirlangan hikoyalar o'rin olgan.