product summery

Аллоҳ субҳанаҳу ва таолога У Зотнинг улуғлигига муносиб ҳамду санолар бўлсин! Аллоҳ таолонинг охирги Расули Муҳаммад Мустафо соллаллоҳу алайҳи васалламга мукаммал дуруду салавотлар бўлсин! Аллоҳ таолонинг муқаддас каломи Қуръони Карим инсониятга икки дунё саодатининг йўлини кўрсатиб берувчи илоҳий дастуриламалдир. Ушбу муқаддас китоб башариятга Аллоҳ таолони танитиб, У Зот юборган Ислом динининг арконларини баён қилган. Ушбу мукаммал баённинг учдан бир қисми ибратли қисса ва ҳикоялардан иборатдир. Бу қиссаларда анбиёлар тарихи, расулларга иймон келтирган бахтиёр умматлар ҳамда уларга осийлик қилган бахтиқаро қавмлар, Одам алайҳиссаломнинг ўғиллари, Сулаймон алайҳиссалом ҳамда чумоли, ҳудҳуд воқеалари, Мусо алайҳиссалом ва Фиръавн қиссаси, Юнус алайҳиссалом ва балиқ ҳодисаси, Юсуф алайҳиссаломнинг гўзал сийратлари, Аллоҳ таолонинг энг сўнгги ва энг улуғ Пайғамбари бўлмиш Расули Акрам соллаллоҳу алайҳи васаллам билан боғлиқ воқеалар келтирилган. Уларнинг барчаси мўмин-мусулмонлар учун йўл-йўриқ ва ҳикмат манбаи бўлиб хизмат қилиб келган ва Қиёматга қадар шундай бўлиб қолажак. «Бир марта ўқинг, минг бора ўйланг!» деб номланган ушбу китобда Қуръон ва Суннатдаги мўъжизалар, ибодатлар, уламоларнинг ҳаёт йўли, фазилатли амаллар ҳамда разил иллатлар ҳақида, ахлоқ-одоб, оилавий муносабатлар, фарзанд тарбияси ҳақидаги ҳаётий ҳикматлар, ибратли қисса ва воқеалар келтирилган. Китобга islom.uz порталимизда, ижтимоий саҳифаларимизда сиз азизлар томонидан кўп мутолаа қилинган мақолалар ҳам киритилган. Умид қиламизки, ушбу китоб орқали ўқувчиларимиз Ислом дини ва бу дин тарғиб қилаётган қадриятлар, раҳм-шафқат, адолат, силаи раҳм, поклик ва соф исломий эътиқод ҳақида чуқурроқ тушунчага эга бўладилар, ўзлари учун манфаатли бўлган кўплаб ибрат ва хулосалар оладилар. Аллоҳ таоло ушбу асарни барча мўмин-мусулмонларга фойдали, манфаатли қилсин, бандалик ила йўл қўйилган саҳву хатоларни Ўзи мағфират айласин. Набиййимиз Муҳаммад соллаллоҳу алайҳи васалламга ва у зотнинг оли байтларига, саҳобаи киромларига салавоту саломлар бўлсин. Оламларнинг Робби Аллоҳ таолога ҳамду санолар бўлсин! Исмоил Муҳаммад Юсуф.